Kalo sa beta sonde parnah kanal sa lu nona
dan lu ju sonde kanal beta
Mungkin beta sonde parnah tau,
Itu rindu pung rasa ke karmana.
dan kalo beta ju son parnah lia lu
Mungkin be son parnah tau kalau pagi pung indah tu ke karmana..
Apa lai matahari pung rasa ke apa
Kalo sa beta sonde parnah kanal lu nona
Apa lai sampe jatoh cinta deng lu
Pasti be son tau itu rindu yang bagaru dihati tu ke karmana
Be rindu lu pung sanyum yang manis ke sirup ABC tu
tambah lai deng lu pung rambut kariting yang salalu suruh beta beli bawa vitamin
Beta rindu lu pung muka yang manis ke lemon cina
Betaa rindu lu pung apa lai ko...Pokoknya beta rindu mati samua yang ada di lu nona
Rindu yang sakarang tagantong di be pung hati ni
Su tatanam ba batu mangan hanya buat lu sayang
sampe su malele, ba becek sa
Kalo beta bisa bikin bandungan sa
Pasti beta su bikin sama ke di tilong atau yang ada di raknamo
Biar tampung itu samua rindu ko bisa pake siram itu bunga cinta
Yang beta su tanam di lu pung hati
Beta su coba pel buang lu pung bayangan
Di beta pung hari-hari hidop
Tapi yang be rasa.. Kalo be lia lu pung foto profil di facebook itu
Be mo makan anteru-anteru saaa...
Biar ko lu salalu dekat di be pung hati...
